الاحاسيس

الحاجات التى تحدث لنا لا قيمة لها وماتفرقش وكذلك الاشياء الماديه ولا تسوى حاجه
حاجه واحده بس هى كل حاجه...احاسيسنا...انت حاسس بايه
نفس الموقف بنفس كل حاجه لو اتغيرت حالتك النفسيه .... التغيير ده فى احساسك يخلى الموقف وحياتك حاجه تانيه

يعنى كتير اوى بيراودنى حلم يوازى حلم انى اطير ايام ما كنت عيل..الحلم ده ان يبقى عندى كنترول داخلى على احاسيسى....فى عز ما اكون حاسس احساس سىء وعن طريق التحكم الداخلى اقلب على احساس حلو.....ماتستغربش بقولك حلم يوازى انى اطير

طب ايه هى اهم الاحاسيس
1- الأمل ......وأرى انه الاول بلا منازع
2- تحقيق هدف .....والغريب ان ده فترته قصيره وجرى نفسك بتحط هدف تانى تجريك وراه...... فاكر فرحتك بالثانوية العامة
3- التغيير...... وده ممكن يكون حلو او وحش....بس انا بحبه
4- انك كويس " الثقة "..... ودى بتيجى غالبا بعد تحقيق هدف....او ممكن بعد مدح من حد

طيب اسوأ الاحاسيس
1- اليأس.... باين ليه
2-العجز.... اخو اليأس التؤام
3- الفشل...بشع بشع
4- الغضب

سبب كتابة التدوينه دى حاله بتجيلى فى الاجازات الطويلة من التردد بين المشاعر الحلوة والوحشه

وللحديث بقية
عبدالحكيم

سمكة ودوده ومدير

كنا نسمع واحنا اطفال عن قصص الصياد البسيط اللى بيخرج ورزقه على الله ومش عارف هيرجع لعياله بسمك ولا لأ ويرمى الشبكة مره واتنين وعشره ومفيش سمك وتانى يوم وتالت يوم وهكذا الى باقى القصه ايا كانت
قصه اخرى عن الحطاب اللى عمله شاق ويخرج الى الغابه ثم يحمل الحطب على اكتافه ويرجع الى السوق ليبيعه بثمن بخس ليشترى بعض العيش لاولاده وهكذا
وقصه اخرى عن الفلاح اللى بيزرع القطن لمدة شهور ويحرث الارض بمساعدة البقرة وبعدين الدودة تيجى تاكل نص المحصول الى نهاية القصه

هذه القصص كانت تشرح حياة ما قبل التكنولوجيا وما قبل الوظائف الحديثة زى الاتش ار والذى منه
اتذكر هذه القصص وانا اشعر بالابتلاء فى عملى ولكن لكل وظيفة ابتلائها واعود لاسأل نفسى هل اختلفت حياة الانسان
واجيب مش كتير
فقط على قدر ما كانت الحياة بسيطة وواضحة كانت الابتلاءات كذلك
ولكن فى حياتنا حاليا الشغل حاجه معقدة ناس كتير ووظائف متعدده والانسان عمل نفسه فاهم واصبح ترس فى منظمة صغيره او كبيره ولكنه فى الاخر ايضا يبتلى...زمان كانت دوده وسمكة وبقره
دلوقتى مدير مش فاهم وشركة تايهه وموظفين منفسنين وكلام كبير وواقع يمرض
المشكله كما ذكرت لصديقى اكرم فى احد مكالمتنا اننا جيل بتاع انترنت يعنى بندخل نشوف اخر ما وصل اليه العالم فى الشغل وغيره ولكننا فى بلد تدار الامور فى كثير من منظماته بطريقه تدفعك دفعا لان تكون موظف بليد وعبيط وتتحدا اى روح عندك وتجعل مثلك الاعلى موظف الحكومة النمطى اللى بيستنى ايام الاجازات والعلاوة
والمشكلة انى عارف لو جريت ورا الشركات اللى بره هفقد شىء اخر فى حياتى
ولما فكرت فى الحل ....لقيته لازم يكون فى قصة الصياد
هو كان يرى ذلك ابتلاء من الله ويصبر حتى ياتى يوما ليجد فيه السمكة التى ينتظرها...وانا كذلك
اللهم اجرنى فى مصيبتى واخلفنى خيرا منها

وللحديث بقية
عبدالحكيم

انا وحيد

انهارده كنت بتكلم مع خطيبتي وكانت بتكلمني على رمضان
واجمل ايام رمضان اللي عاشتها فبعد ما خلصت كلام معاها
تفاعلت شويه مع موضوع رمضان ده ودخلت على اليوتيوب وعملت بحث عن اغنيه رمضان جانا
اللي كلنا عارفينها واللي كلنا كنا بنستناها في رمضان
وأثناء وانا بتفرج على الكليب وشوفت الكلبات اللي متعلقه برمضان
انتابني أحساس لأول مره احساس اني وحيد وده اللي ماكنتش واخد بالي منه من ساعة ما سافرت وسيبت مصر
افتكرت اد ايه اني كنت وحيد طول الفتره اللي فاتت وده لان البلد اللي انا فيها مافهاش نفس المظاهر بتاعت رمضان واللمه الجميله بتاعت
رمضان والفطار مع بعض والتراويح انت واصحابك وبعد التراويح نقف في الشارع
ونتكلم في كل حاجه وكمان الجو الجميل بتاع رمضان والخير الفياض اللي الناس بتبقى فيه
والروح الجميله اللي بتبقى بين الناس ومنظر المحلات وياميش رمضان والفوانيس والحركه الغير طبيعيه اللي بتبقى موجوده
واستعداد الناس في اخر ايام رمضان لإستقبال العيد
للأسف انا بفتقد ده جدا هنا اي نعم هنا في حاجات حلوه كتير برده
بس انا بفتقد كل ده هنا
هنا رمضان بيعدي عادي جدا كل ما هناك تروايح وصلاه وبس
وتروح تعمل عمره وكده يعني
لكن لو بصيت للموضوع تلاقي انها ايام عاديه جدا
زيها زي الايام العاديه بس كل ما هنالك ان في شويه حاجات زادت

عايز اقول حاجات كتير

عاوز اقول حاجات كتير ولكن معنديش وقت ارتب واحسوك زى كل مره
اولا قرفان من الشغل ....النظام فى شركتى عنده القدره انه يفقدنى القدره والحماس على العمل.....وممكن القدره عن الكلام كمان
قرفان من فكرة الشغل فى الشركات عامة...نفسى ابقى كاتب او محاضر او صحفى
او طبعا افتح سوبر ماركت
بدأت افقد الثقة فى نفسى وهى اهم شىء...فعلا اهم شىء
حاسس ان العيب فيا....الشغل نيله...بس انا برضه مش مظبوط
مقصر فى حاجات كتير ....مقصر فى دينى...وفى الماجستير وغيره وغيره
حتى اوضاع البلد تروش
الوقت يجرى فى شكل دوائر مكرره تتحدى اى شخص ان يوقفها
البحث عن الجديد ليس هو الحل
انهاء المطلوب سابقا ايضا لا يأتى بجديد
الحل هو الامل وعودة الروح
ومابيرجعش الروح الا اللى خالقها
يا رب حل مشاكلى

4 سنين وانت معانا

اربع سنين وانت شايلا الهم معانا
عبدالحكيم 12 مدونة
اكرم 6 مدونات
مهند مدونتين
هكملها بعدين

البشارة

اليوم شاهدت شيئا غريبا لم اعتده

كنت خارجا لصلاة الجمعة و بداخلي مزيج من المشاعر المتناقضة... الرجاء مسحة من الحزن بعض الغضب والاكيد ان بداخلي رغبة شديدة في ان ارى بارقة امل من اي شكل وما ان خرجت من باب المنزل حتى رأيته وقد خطف عيني واذهلني ان اراه......

كان يهبط بكبرياء شديد وينظر لي بشدة وكأنه يتساءل عن سبب وجودي وحيدا في الشارع او لعله كان يمعن النظر في وجهي ليعلمني انه آت من اجلي بالذات ثم وقف بشموخ مذهل في مكان اعلي منى ونظر لي بثبات... لا اعلم لم نطقت بالشهادة وسبحت الله مذهولا بالمنظر

من الغريب جدا ان يقترب امثاله بالبشر هكذا و الاكثر غرابة هو ان سمح لي بالاقتراب منه لهذه الدرجة حتى ان الفارق بيني وبينه كان خطوة واحدة

لم يتحرك.. لم يبتعد

كان صقرا رمادي اللون مهيبا و رائعا

بحثت كثيرا حتى وجدت صورة تشببه اضعها مع الموضوع

خطفني منظره واحسست انه يحمل بشرى سعيدة او نصر قريب, ان المفاجأة التي غمرتني لرؤيته لا يدانيها الا المفاجأة بأنه سمح لي بالاقتراب منه ووالله لو انه كان قريبا في متناول يدي لاقتربت منه ولمسته ولا شك لدي انه كان سيمنعني

لقد نظرت لعينيه لحوالي الدقيقة لم يبعد خلالها هو الاخر نظره عن عيني وكأنه يقول لي نعم انا اقصدك انت ولم يتحرك من مكانه الا لما هممت بالابتعاد عنه لالحق بالصلاة

استبشرت به كثيرا ولا اعلم لماذا واغلب الظن ان امثاله لا يظهرون بهذا الشكل الا لسبب يعلمه الله او لعلها رسالة؟

لا ادري ولكن بالتأكيد بيشغل هذا الموقف بالي كثيرا و لن انساه بسهولة

وارجو من الله ان يكون فيه بشارة بالفعل ويكون مرسلا لحمل خبر نصر او خير

يارب اجعل لنا حظا من هذه البشارة

آمين

أحاسيس متضاربه في حبها

شوية احاسيس متضاربة
مش عارف انا بحبها ولا لأ
ولا حتى عارف انا عايز اروحلها ولا لأ
لما حد يتكلم عنها ماببقاش مستحمل كلمة عنها
ووقت تاني بيبقى الكلام عادي ولا كأنه كان عنها
ولما بسمع اغنية عنها ببقى عايز اللبس وأروحلها
واحيانا كمان بغني أغاني في حبها
ووقت تاني ما ببقاش مهتم اني اسمع حاجه تخصها
انا ببقى فخور قوي اني منها
بس في اوقات ببقى زعلان قوي منها
بس طول الوقت قلقان عليها عشان فعلا بحبها
ودايما تلاقيني شايل همها
وأوقات تانيه ماببقاش قادر انزلها
يمكن ما بحبش حرها؟
ماهو بس برده أحلى جو جوها
وبعدين ماللي انا فيها دلوقتي أحر منها
يمكن المشكله في شعبها
بس ازاي؟ دول من احسن الناس اللي شوفتها
على فكره انا عرفت خلاص اني بحبها
عشان كل ذكرة كانت في قلبها
وايام طفولتي كمان هناك عشتها
وهناك كمان عشت السنين الحلوه كلها
يمكن كان هناك شويه حاجات زعلتني منها بس برده بحبها
وبعدين دي فيها كل الناس اللي ماقدرش استغنى عنها
ماهى بلدي ماقدرش برده استغنى عنها
ومسيري يوم ارجعلها
يمكن عشان اكمل حياتي على ارضها
أو حتى اموت وابقى ادفن في بطنها
انا شكلي فعلا بحبها

الانترفيو منهج حياة

انها اهم قعدة فى حياتك....قد تجد نفسك بعدها على اول السلم لتكون فى مصاف الاغنياء اصحاب السيارات والشاليهات او تكون من المعذبين فى الشركات اللذين هيموتوا على الزيادات
او تجد نفسك متجه الى السعودية او السودان او قريبا من صاحب الشركة او تحت مدير ينسيك اسمك الحقيقى والدلع كمان
او تجد نفسك فى شركة مالتى ناشيونال اووووه سيتروه...او شركة اشبه بالورشة هأوأوأو
انه الانترفيو.......تا تا تتا
فعلا الموضوع واكل دماغى ولذلك قررت ان اكرس حياتى وانشطتى من اجل هذه القعدة
انا على فكره من غير مقصد بعمل كده .....مثلا
انا بحضر ماجستير علشان لما اقعد فى الانترفيو اقول ان معايا ماجستير
وبعمل حاجات فى الشغل علشان لما يسألونى اقول انى بعمل كيت وكيت
ومابخدش اجازات علشان لو جالى انترفيو اخد اجازة من غير ما حد يعارض
وباخود كورسات واعمل داونلوود لكتب عن اسئلة الانترفيو
وخد دى.....بعمل انترفيوهات علشان ابقى جامد لما اعمل انترفيوهات....تدريب يعنى

حد هيقول .....ياعينى دى حياة صعبة اوى
وانا اقولك بالعكس انا مستمتع بده جدا...مش بس كده عاوز ازود الجرعة
ده هدف اجمل بكتير من انك تحقق انجاز فى الشغل ليه
اولا ده يجيب فلوس على طول مش زى الشغل اللى بيعطفوا عليك ويزودوك رقم هما شيفينه
ثانيا ده فى تحدى ممتع شبه الهروب من السجن فى فيلم شوشنك....وتتخيل انك لما تمشى بتحرق دمهم
والاهم انك هتشوف حاجات جديدة ودماغك هتوسع....سى لا فى
انا كنت قرأت زمان كتاب قالك المفروض تقف قدام المرايا وتسأل نفسك اسئلة الانترفيو وتسجل شريط عن الاجابات النموذجية وتسمعه فى العربية كل يوم رايح جى....وده اللى ناوى اعمله ان شاء الله...عن عننننننن

وللحديث بقية
عبدالحكيم

الفوضى تربح دائمًا لأنها أفضل تنظيمًا !

الفوضى تربح دائمًا لأنها أفضل تنظيمًا !

حد سأل نفسه لو كان حد ف العيال اللي بدأت الثورة دي فكر مع نفسه 5 دقايق كان حصل ايه؟

الاجابة ببساطة انه كان مش هايحصل اي حاجة و كان زمانا دلوقتي لسه بتقرا التريقة و الكاريكاتير اللي بيتنشر في الدستور و بندور على اي حاجة تلهينا انما اللي حصل فعليا ان ما حدش ف الناس دول كلهم فكر!!!!

حد فاهم حاجة؟

بجد هو التفكير العقلاني ده بيجيب ورا ولاهو من مثبطات الهمم؟ ولا العيب ف طريقة تفكيرنا؟ ولا العالم هو اللي مش منطقي؟ و لا البيضة قبل الفرخة؟ ولا البيضة هاتتفقش علينا؟

انا يا اخواني بالفعل كرهت عقلي و بقى نفسي ابقى غبي

و من محاسن الصدف ان شغلي مازال واحد من اكبر المعرقلات الفكرية... مش بس علشان اعاجيب الدنيا اللي بتحصل في دورة اتمام العمل لا و انما علشان استخدام العقل داخل العمل لا يؤدي الا لرفع ضغط الدم و لا تستطيع ان تشكو

نفسي اعمل زي العيال بتاعة التحرير...

نفسي اخد قرار متهور...

نفسي اضرب حد او اعمل تصرف خاطئ...

انا طول عمري باتصرف صح مش صح علشان هو صح فعلا انما علشان انا ماشي طول عمري بين قوسين.. دايما ف المقبول و المعقول و الممكن عمري ما اتصرفت بشكل غلط من وجهة نظر "الناس الكبار"

اصحابي زمان كانو مسميني جبنة "نسبة الى الجبن و الخوف" زمان كنت باقول لنفسي اني باتصرف الصح انما الحق اني دلوقتي بقيت مصدقهم و حاسس اني عيشت عمري كله جبنة

نفسي حتى ارجع جبنة و انا ماعرفش او بمعنى اخر ارجع مش فاهم اني جبنة لكن برضه مش عارف

والله يا اخونا الموضوع مش موضوع رغبة في التنفيس لا ده موضوع كره لعقلي و تفكيري و نمط حياتي و قراراتي ... حد فاهم حاجة؟

نفسي ابقى زي الواد اللي ف الصورة ده ... حد شايفه كويس؟

نظرته مليانة تعبيرات و كل تعبير خارج من قلب قلبه

تحدي و اصرار و استهانة بالخصم و ثبات و ثقة في الانتصار و انكار للذات يا اخي حتى الكوفية اللي حاططها على وشه معناها ان مش قصده الاستعراض.. يا اخي النار اللي وراه دي مستهتر بيها

انا كاره الخوف اللي بيسيطر على حياتي و بياخد القرارات بدل منى

اشتغل اللي ف ايدي عشان خايف من الفقر و الجوع

اتصرف بميوعة و اسكت على تصرفات غلط عشان خايف من الادارة تعاقبني

استحمل افكار متخلفة و انظمة مقززة عشان خايف على لقمة العيش

يلعن ابو الخوف اللي بيتصرف على مزاجه ده ... ده حتى مراتي بقيت بانام معاها عشان خايف تفتكر اني ما باعرفش!!!!!!! هاعمل اللي انا عاوزه امتى؟؟؟؟؟؟؟؟؟؟؟؟؟

يا اخوانا نفسي اعمل حاجة انا عاوز اعملها فعلا و ابقى مستمتع و انا باعملها

طب بلاش نفسي استمتع و انا باعمل اي حاجة

طب بلاش نفسي انا اللي اعمل الحاجة مش خوفي هو اللي يعملها

حد عنده اجابة؟

اللي يعرف ما يقوليش ... عشان انا خايف ما اعرفش اعملها !!!

لحظات حرجة

اكتب هذه المدونة وكلى شوق الى اللحظة التى سأقرأها فيها واجدها احدى المدونات القديمة
واقول يااااااه اهى عدت زى غيرها وكنت شايفها عصيبة

ليه بقى
الشغل يا جماعة بقى بالنسبالى زى الغطس تحت المية اللى باخده وانا كاتم نفسى مستنيه يخلص لدرجة انى مش بفرح بالساعة خمسة انها جت...ده انا بفرح بالساعة اربعة علشان الساعة خمسة بتكون قربت
يومى ببدا الساعة تمانية بروح متأخر شوية...واتلكع تبقى تمانية ونص
قعد اعمل اى حاجة تبقى تسعة
اقعد مع شباب الجودة واخش فى اى حوار واطلع وانزل تبقى 11 وربع ...هانت كمان شوية هطلع اصلى
احاول الخم نفسى الاقيها 12 وربع...هانت خالص
اى حركات ...هبا تبقى 12:50...كويس كده ممكن اطلع اصلى مع زمايلى
ودى فرصة احسس نفسى انى مش فى الشغل...نفس يعنى مع الغطس ...انزل تكون اتنين
هانت تلات ساعات مش كتير
اقرص على نفسى زى اللى نفسه قرب يخلص تحت الميه....بقت تلاته ونص
هانت ارصه كمان....بقت اربعه ...هييييييه
اطلع اصلى العصر..وانزل ابص بصه...بقت 4:50
اقدر اعتبر اليوم خلص.........جرى عشان اروح
وانا بقول لنفسى بتهرب من ايه مانت راجع تانى بكره

وللحديث بقية
عبدالحكيم

25 يناير

وقامت الثورة
اورحل محمد حسنى مبارك
حقيقه اشبه بالحلم...لم نكن نتخيل يوما ان هذا يحدث....فقط فى 18 يوم.....كان نفسى اسجلهم لحظه بلحظه
احاسيس كتير عشتها وذكريات مع متابعة الاحداث والنت المقطوع والسهر مع اللجان الشعبية بالعاشر
ما زلنا نعيش فترة التوابع او قل الثورة ما زالت مستمره والله اعلم بما هو قادم
ولكن لانى معرفتش ادخل على النت من البيت غير الاسبوع الماضى...هسجل هنا بعض الاراء اللى كتبناها انا واصحابى نقلا عن فيسبوك

3-2-2011
عبدالحكيم :
الى اصحاب النظرة الاستقرارية الفذه........هل تتوقعون حال البورصةوالجنيه ونظرة المستثمرين فى الشهور القادمة مع استمرار ذات النظام الذى تسبب فى الاحداث
__

ابوس راس اى حد.....محدش يقولى الناس بتضرب بعض فى التحرير......واحد كان بيتفتش تفتيش ذاتى وهو داخل وواخد ابنه الصغير معاه.......التانى داخل راكب جمل ومعاه سلاح......هو فى حد من الشعب العادى يروح مظاهرة تأييد ياخد الجمل بتاعه معاه.....اللهم قنا شر الغباء

___

لا تتوقفوا عن هذه الادعية...... اللهم احفظ دماء المسلمين......اللهم قنا شر الفتن

__

ايهما اسهل ان تقنع اكثر من مليون شخص بالتنازل عن حقوقهم وهم من لدغوا من الجحر مئات المرات.....او ان يقتنع شخص واحد بترك العناد وهو البطل المحارب الذى لا يطمع فى السلطة ويخشى على ابناء الوطن والذى ضحى كثيرا كما يقولون.....انها الموازنة
اللهم قنا شر الفتن واحفظ دماء المسلمين

5-2-2011

الى اصحاب العقول الراجحة.....فليكن حوارا مثمرا.....شعبنا العزيز كان يأخذ الاحباط حقن واليأس يشربه مع الماء ليل نهار.....وتعلموا كلمة مفيش فايده قبل كلمة امبو.....يرضوا بالفتات ولم يتخيلوا يوما ان يأخذوا منحة بعدم الذل لمدة ست سنوات اخرى....فهذا امر شب عليه الصغير وهرم عليه الكبير ...ولكنهم بدأوا يفكرون ....يتخبطون ولكن ..... ارى ضوء الفجر باذن الله

6-2-2011
اكرم:
رداً على كل محاولة المخذلين الذين يحاولون احباط المظلومين ف التحرير

رداً على محترفي الزحف على البطن
ردا على مدعي الحكمة حفاظا على استقرار الظلم و مقاومة التدخل الاجنبي
----------------------------------------------------------------------------------
الظلم طعمه وحش و فيه ناس ما بقاش فاضل عندها حيل تشيل الظلم
...
قال علي بن أبي طالب -كرم الله وجهه-: ما جادلت عالماً إلا غلبته، و ما جادلت جاهلا إلا و غلبني

6-3-2011
عبدالحكيم :
عندما يبدو كل شىء كالضباب ...ثم يبدو وكأنه مؤامره ......ثم يبدو كالطبيعى.....ثم يبدو كالضباب......قل لن يصيبنا إلا ما كتب الله لنا
.

وللحديث بقية
عبدالحكيم

الاصوليون

الأصوليون..

قومٌ لا يحبون المحبة!

ملأوا الأوطان بالإرهاب..

حتى امتلأ الإرهاب رهبة!!

ويلهم..!

من أين جاؤوا؟!

كيف جاؤوا؟!

قبلهم كانت حياة الناس رحبة!!

قبلهم ما كان للحاكم أن يعطس

إلا حين يستأذن شعبه!!

وإذا داهمه العطسُ بلا إذنٍ..

تـنحى..

ورجا الأمة أن تغفر ذنبه!!

لم يكن قبلهم رعبٌ

ولا قهرٌ

ولا كانت لدى الأوطان غربة!!

كان طعمُ المرّ حلواً

وهواء الخنق طلقاً

وكؤوس السمِّ عذبة!!

كانت الأوضاع حقاً مستـتبة!!

ثم جاؤوا...

فإذا النكسة..

تأتينا على آثار نكبة!!

وإذا الإرهاب

ينقضُّ على أنقاضنا من كل شُعبة!!

واحدٌ... يقرأ في المسجد خطبة!

واحدٌ... يشرح بالقرآن قلبه!!

واحدٌ... يحمل (مسواكاً) مريباً!!

واحدٌ... يعبد ربه!!

آه منهم!!

يستفزون الحكومات

وإن فزّت عليهم

جعلوا الحبّة قبة!!

فإذا ألقت بهم في الحبس

قالوا أصبح الموطن علبة!

وإذا ماضربتهم مرةً

ردوا على الضرب بسبة!!

وإذا ما حصلوا في الانتخابات على أعظم نسبة

زعموا أنّ لهم حقاً

بأن يستلموا الحكم

كأنّ الحكم لعبة!!

وإذا الدولة في يومٍ

ثنت للغرب ركبة

أو لنفرض وفّرت للغرب ركبة

ولنـقل نامت له نوماً

-لوجه الله طبعاً لا لرغبة-

البذيئون يقولون عن الدولة (----)!!!

الأصوليون آذونا كثيراً

وافتروا جداً

ولم يبقوا على الدولة هيبة!!

فبحق الأب والإبن وروح القدس

وكريشنا

وبوذا

ويهوذا

تبْ على دولتـنا منهم

ولا تـقبل لهم ياربّ توبة!!!

يوميات موظف

حقا انها لحظة تستحق الكتابة
جيت بدرى الشغل (سابعة بدل تمانية)والدنيا تلج
النت قاطع من عندى فى البيت بقاله شهر وامبارح كنت فى غرزة اللى بيسموها سيبر علشان اشوف الميل
اما عن العمل فحدث ولا حرج...يكفيك ان اقول لك اخر ابداعتى من الحكمة الشغلية...الجملة الاتية
هو احنا ليه بنستبعد خيار اليأس من الاختيارات
ايه رايك بقى...
حالة نفسية لوز
السبب...حاجات كتير ومتداخلة اهمها اننى اشعر بحالة من فقدان التوازن فى الشغل مع شوية يأس وكبشة زهق واحباط
ليه...انا يا سيدى مقدم طلب يجيبولى مدير...ايوه انا ماليش مدير
اى نعم فى اربعة بيشغلوا القسم من وقت للتانى....بس بالمفهوم المؤسسى انا ماليش مدير
واحد فيهم ...امضى منه اجازات بس..ما يعرفش اى حاجه تانى
واحد تانى...لما بيكون فاضى او لما بيفتكرنا بيقعد معانا شوية ( تقريبا ده بيصنف على انه مديرى الحقيقى اللى هو الاوونر )..يعنى
واحد تالت...فوق التانى او تحته عامل زى الحته اللى فى نص الساعة الرملية فوقه كل الناس وتحته الباقيين...ده سيادتك اللى بيساعدنى افهم ليه سمه الجمبرى جمبرى ومسمهوش بعجرى ده لما بيكون فاضى...بالبلدى بيعلمنى اسرار الصنعه الخلل.....وطبعا لما برجعله بحاجه بيكلمنى بروح ياسلام سلم الفرخة بتتكلم
الرابع بقى...ده لما بيقابلنى فى الترقه بيقولى اخبارك ايه ويقعد معايا يحكيلى ازاى اكون مهندس ناجح وانى لازم ادوس اكتر من كده
بس يا ريس
قمت مقدم طلب ان يجيبولى مدير
قالولى حاضر...فى اقرب فرصة هنحققلك طلبك يا سيد...انت بس حاول معانا.....الشاطره تغزل باييييييييه
طبعا علشان الامور توضح احنا بقالنا اكتر من شهر بنكاكى على عامل بوفيه فى اهم دور فى المصنع اللى فيه الاوونر و الجى ام
المهم ان حقنه الانتيبيوتك خلصت...هعمل ايه مش عارف...اسيب نفسى ولا اشغل روح النمر الاسود... مش قادر
كده او كده انا مسلمها لله وهحاول اخد بالاسباب...لان مفيش حاجع بعيده على ربنا
وليست تجربة شركتى السابقة منا ببعيد

وللحديث بقية
عبدالحكيم

كوك زيرو

يعني ايه كوك زيرو؟؟؟؟

يعني مصر يبقى فيها اقوي جهاز امنى ف المنطقة

و البرادعي و الاخوان و ايمن نور و حركة كفاية

و ف الاخر ثورة التغيير تحصل ف تونس

حقا

بسم الله الرحمن الرحيم

الاجابة

ت و ن س

الريس عمر حرب

على رأي الريس عمر حرب:

الشغل زي المستشفى تدخله عريان و تخرج منه بعد ما ياخده منك عضو من اعضائك

و لبس الشغل زي لبس العيانين يغطيك من قدام بس انما ؟؟؟؟ لامؤخذة بتبقى عريانة