ورجعت تانى

ورجعت تانى سلطان زمانى

من على ظهر ميكروباص
عبدالحكيم

لحظة تاريخية

لحظة تاريخية (انا شايفها كده)

1-مش حابب الشغل بتاع الصيانة الى انا بشتغلة
2-عليا مسئوليات بدون صلاحيات
3-مديرى مشى وبقيت تبع مدير الانتاج الطيب واللى مش عايز يشيل المسئولية وطبعا مش عارف حاجة عن الشغل بتاع قسم الصيانة
4-اللى معايا فى القسم اصحابى وطبعا مش معتبرين انهم المفروض يسمعوا كلامى
5-انا مش عايزهم يسمعوا كلامى بس عايز محدش يسألنى عن كل حاجة ما دام الوضع كده
6-واحد فيهم طول النهار يشيت ولو فى مشكلة مع مقاول او مورد بيقولى امه سيبهولى وانا اطلع عينيه...قال يعنى ده الحل
7-نفسى اسيب الشركة دى بس الاوضاع ماتسمحش
8-بمعنى اصح مش عارف امشى ازاى ولا حتى اروح فين؟؟
9-الامل فى ربنا كبير..ومفيش مستحيل ان شاء الله
10-بقول لنفسى : بكرة تفتكر الايام دى وتضحك
11-ارتحت شوية لما كتبت المدونة دى

عبدالحكيم

المصريين

يعانى المصريين من مشاكل عديدة ولكن فى اعتقادى ان اهم مشكلة عند المصريين هما المصريين انفسهم
واعتقد ان الحل هو المصريين

بدون فلسفة كدابة وببساطة افكار المصريين وتصرفاتهم ونظرتهم للامور وخاصة نظرتهم لانفسهم
طبعا انا مقتنع ان اى مشكلة ليها عدة عوامل مش عامل واحد ولكن
اهم مشكلة فى رأيى هو الاحساس بالهزيمة النفسية اللى عند المصريين يعنى بالبلدى احساسهم انهم وحشيين
لا لا لا لا انهم اسوأ شعب.....كارثة حقيقية
انا من كتر متكلمت عن الموضوع ده عندى امثلة كتير عن عدم واقعية الموضوع ده وتأثيره السلبى...بس هختصر قد ما اقدر

اول مرة خدت بالى كنت بدور على حاجة مش فاكر هى ايه ليها علاقة بالدخل القومى او معدل النمو..حاجة كده
المهم انها قائمة فيها الدول كلها
فوجئت اننا مش اخر دولة ولا من اخر عشر دول ولا من اخر عشرين...احنا من المجموعة التى كانت فى المنتصف
واحد هيقولى.... شفت عمرنا ما هنبقى فى المقدمة طول عمرنا زفت اسألنى نا
ايوه بس فى دول كتير قوى اقل مننا...حتى مجموعة المنتصف محناش اخر ناس فيها
قلت..ايه ده يعنى احنا احسن من ناس كتير...وبدأت افكر

وبدأت اعمل تجارب (حتة توماس اديسون) قصدى يعنى اخد رأى الناس واتفرج على رد فعلهم
واحد صحبى غاوى كورة ..دى ابسط حاجة ....وكنا واخدين كأس الامم وداخلين على اللى بعده
فله اهه
اول ماتش كان مع الكاميرون..قاللى هيقطعونا..قلت له ده احنا رقم واحد فى القارة.... قاللى يا عم انت بتصدق
غلبناهم 4 -2
قلت له شفت ...قالللى يا عم السودان هتفرتكنا
غلبناهم...قاللى متفرحش قوى لسه زامبيا
وهكذا ماتش ماتش حتى النهائى
كان مع مين...الكاميرون ...قاللى مش هنكسب...قلتله يابنى احنا مش كسبناهم من كام يوم
وكسبناهم..وخدنا الكأس تانى مرة على التوالى
حاجة تجنن مش كده

موقف تانى كنا فى كورس عن السلامة والصحة المهنية
المهم الراجل بيورينا حادثة حصلت فى امريكا
وبنحلل الاهمال والاخطاء
طبعا التعليق انجليزى والناس امريكان
المهم بيسألنا ايه تعليقكم..واحد قال اهمال
واحد قال ....مصر

وللحديث بقية
عبدالحكيم

المؤمن

«ألا أخبركم بالمؤمن؟ من أمنه الناس على أموالهم وأنفسهم ، والمسلم من سلم الناس من لسانه ويده، والمجاهد من جاهد نفسه في طاعة الله،والمهاجر من هجر الخطايا والذنوب»