جتلى فكره

اكمالا لكلامى بتاع امس
انا جتلى فكره جامده جدا...لسه جيالى حالا

انا ممكن امثل ....ايوه اشتغل ممثل
بس ابقى ممثل متخصص...اطلع بدور مهندس انتاج بس...وممكن جوده...وممكن مدير لو عملولى شعر ابيض
مش فردوس محمد كانت دايما ام وعبدالوارث عسر كان دايما راجل كبير حتى وهو شاب
يااااااااااااااه....جامده موت

اولا هاخد فلوس كتير
ثانيا هشتغل فترات وبعدين اعيش حياتى فترات اطول معملش حاجه...ممكن اعمل لقاءات او اطلع فى برنامج حيلهم بينهم
ثالثا مش هحتاج سيناريو ولا حوار..انا عندى الحوارات جاهزة
سهلة جدا هقول واعمل نفس اللى انا بعمله الان...مشهد اطلع اتكلم عن مشكله....مشهد فى اجتماع ...مشهد مع المدير وانا بقوله فكره جديده ....مشهد مع العمال بحمسهم ....مشهد مع زمايلى فى المكتب بنحلل المشاكل.....بس الجديد ان ممكن اعمل مشهد اقول اننا نفذنا الحل ونجح
ووووووههوووووو

عبدالحكيم

الاحباط

لا لا لا...محدش يفهم ان انا محبط
انا بس محبط
.......
نفسى افهم ليه بيجيلى الاحباط ساعات
هما ساعات كتير بس برضه ساعات ساعات...على رأى الشحرورة

طب ما انا عارف اننا فى بلد يأكل فيه الكلب العجوة والفيل بيتهبب ويلعب طاوله
كمان رغم انى بعد ادى نفسى حقن انتيبايوتك نفسى ضد الاحباط
خاصة فى فترات الاجازات
علشان انزل بنشاط.......والتعلب فات فات فى ديله سبع لفات

ورغم ذلك احبط....بعد كام يوم شغل.....طبعا مش بسرعه لحسن حد يفهم ان انا ضعيف
طب ما انا عارف ان الدنيا فى مصر كده وانها اساسا دنيا على رأى واحد
كان يقولى انه لما كان يئرف ابوه...ابوه يقوله يابنى بتتعبنى كده ليه
يقولى يا والدى هى دنيا لازم تتعب فيها

انا بقى عارف انها دنيا ومع ذلك احبط
طب ايه هو الاحباط
شوية حزن وحبتين خنقه ولازم طبعا كثير من اليأس واحساس بقلة الحيلة مع شوية ارف حسب الرغبة

يا عالم حد يقولى المشكله فين...هو الشغل كده ولازم يفضل كده
ولا الفكره مش فى الشغل...الدنيا هى اللى كده

اللهم انى اشكو اليك ضعف قوتى وقلة حيلتى
اللهم اجرنى فى مصيبتى واخلفنى خيرا منها

عبدالحكيم

‘‘Experience is not what happens to you.
It is what you do with what happens to you.’’

—Aldous Huxley

عبدالحكيم