بقالي فتره بتابع اللي بيحصل سواء عن طريق النت او احيانا التليفزيون او عن طريق النقاشات اللي بقت مفيش اكتر منها دلوقتي بين المصريين وطبعا لاني بره مصر حاليا فانا لازم اسأل الناس في مصر عشان ابقى بتابع من قريب وده طبعاً عشان الصوره اللي بتوصلنا بره غير الواقع بنسبه ما، ومن خلال المتابعات ديه اللي اتصدمت جدا !!!!!
اتصدمت جدا لما لاقيت ناس كتير كنت شايفهم قدوه واصحاب رساله مش عارفين يفهموا الموقف صح واتصدمت اكتر لما الموقف بالنسبه ليهم بقى مجرد تحقيق لاهداف أخرى تعنيهم هما واتصدمت اكتر لما لاقيت الاهداف اللي بيجروا وراها مش هى اللى احنا بندور عليها الايام ديه او مش هى المطروحه واتصدمت اكتر واكتر لما لاقيت جموع من الناس ماشيه وراهم من غير ما يفهموا هم رايحين فين وايه الشعارات اللي بيرددودها ديه وهل الشعارات ديه ليها علاقه بالموقف الحالي ولا لأ، انا فعلا مابقتش عارف هو في ايه .... وده وصلني لنتيجه مهمه جدا انه بقى في رؤيه ضبابيه وغياب وعي عند معظم الناس تقريباً.
الرؤيه الضبابيه:
ديه للأسف بقت عند الناس اللي احنا طول الوقت بنعتبرهم من الصفوه والمثقفين أو مشايخنا اللي احنا بتعلم الدين والاخلاق على أيدهم واذاي نقدر نختلف مع الناس بموضوعيه وفي حدود الادب زي ماتعلمنا كلنا من النبي صلى الله عليه وسلم لكن للأسف كله بقى زي بعضه سواء المشايخ او الصفوه او المثقفين والاعجب من كده ان كل فئه من دول ليهم انصارهم واللي عندهم استعداد انهم يموتو عشانهم بصراحه مش عارف ليه ... هو احنا للدرجه ديه بقينا بنخون بعض كده وبقى دمنا سهل كده عشان نموت بعض سواء بأسم الدين أو غيره والأغرب انه بقى في تجمعات لناس واتجاهات فكريه عمرها ماكانت هتتجمع بل بالعكس كانو على طول بيعارضوا بعض وبينتقدوا بعض وفي حرب كلاميه طول الوقت طب ليه محدش سأل نفسه ازاي الناس ديه اتجمعت؟ طب لو قلنا انه عشان مصر والكلام الحلو ده محدش سأل نفسه بقى انه لما الاهداف اللي هما اتجمعوا عشانها تخلص هما هيفضلوا متجمعين كده برده ولا لأ والأهم الجموع اللي ماشيه وراهم ديه بقى هتروح فين ولا هيبقوا في صف مين؟؟ طب مش ده يُنذر بقى بأن ساعة تقطيع التورته هيبقى في تقطيع بني أدميين تاني وده طبعا عشان الاهداف ساعتها هتختلف!! طب فين بقى مصلحه مصر في كل ده؟؟ولا هي مصالح شخصيه وكله بيدور على نفسه وطبعا الناس العظام دول اللي بيقودوا الحركات الوطنيه بأسم انقاذ مصر سواء من الأسلاميين أو غيرهم مانجحوش في اللي بيحصل ده إلا بغياب الوعي.
غياب الوعي :
وده بقى لوحده مصيبه جامده جدا جدا جدا يعني ان انا ابقى بفهم لكن مش قادر اشوف الصوره كويس ديه ممكن تتعالج لكن ابقى ما بفهمش وماعنديش وعي اصلا ونازل اغير الواقع طب على اي اساس انا مش عارف .. للأسف قدرت كل فئه تلغي عقول الناس اللي بتأيدهم زالمؤسف اكتر ان الناس فعلا ماشيه وراهم ومصدقاهم من غير مايدو لنفسهم لحظه يحاولوا يعرفوا وهو بيطلب منهم ليه كده يعني مثلا انا مستغرب جدا من الناس اللي نازله تطالب بتطبيق شرع الله - وده طبعا مفيش مسلم مش عايزه - وهو واساسا مش مطروح على الساحه لا الدستور بيدعم ده ولا في حاجه بتقول ان مصر مش هتبقى مسلمه ، منين بقى جت فكره اننا بندافع عن شرع الله يعني كنت انتظر مثلا ان الناس ديه تثور على الرئيس لان الدستور ماتناولش تطبيق الشريعه بشكل صريح ولا الشكل اللي احنا عايزينه لكن الماده مطاطه جدا جدا وتقريبا ماختلفتش عن الدستور اللي ثورنا عليه، لكن الأغرب انهم بيأيدو الرئيس فلاقيت نفسي مش فاهم حاجه وطبعا على النقيض الناس التانيه اللي عايزه مصر تبقى علمانيه ولا ليبراليه وهنا بقى عايز أساأل سؤال مهم جدا وهو الناس ديه فاهمه حاجه عن العلمانيه ولا اليبراليه اللي بينادو بيها وممكن تودينا لفين؟ الإجابه لأ طبعا ولا دول فاهمين ولا الاسلامين فاهمين والغريب انه بقى في حاله احتقان شديده والناس بتتحدى بعض والناس بتهدد بعض وهما اصلا مغيبين يعني من امتى كان في في مصر مسلمين ومسحيين ومن امتى دول عايزين يقتلوا دول او دول يموتوا دول .. انا فاكر زمان وانا صغير كان جارنا المسيحي اللي ساكن تحتنا كان في العيد بيجيبلي المسدس اللعبه والجراب بتاعه والطلق عشان اللعب بيهم كنوع من انواع انه بيفرح عيال البيت وغيره وغيره وكل اناس عندها أمثله كتير تتقال على الحب والود والتكافل اللي بين المسلميين والمسحيين لكن للأسف نفس الناس ديه بقت بتهدد بعض. انا عايز اقول للناس فقوا واعرفوا ليه بيحصل كل ده وليه في ناس بتستغل جهل الناس وبتستغله ليه.
وهنا بقى عايز اسأل سؤال مهم جدا هل هي ديه بقى السنون الخداعات ؟اللي النبي صلى الله عليه وسلم قالنا عليها اللي بيُصدق فيها الكاذب ويُكذب فيها الصادق ويُؤمن فيها الخائن ويُخون فيها الأمين
