السلم

"انك لن تصعد السلم بمجرد النظر اليه "

مابحبهوش بس هو اللى قالها

انيس منصور

الجواز خدك مننا

الجواز خدك مننا
ومابقتش تسأل عننا
يارب تبقى تودنا
وترجع تيجي عندنا
نشوفك وتقف وسطنا
الجواز خدك مننا
وبكره يا اكرم تحصله
ونروح يا عبده نوصله
وبكره برده نفكره
ان الجواز خده مننا
وانا ماليش غير ربنا
ولسه بكره اما تجيبوا عيال
ساعتها الوصال بقى مالمحال
ربنا يرضا عنكوا وعننا
الجواز خدك مننا

الف مبروك يا صحبي

والله انا مش عارف اقولك ايه لاني بجد فرحانلك
بجد الف مبروك الزواج يا عبد الحكيم وربنا يا رب يوفقك ويباركلك ويجمع بينكم دايما على خير وحب وطاعه لله دائما وابدا
وان شاء الله نحصلك عن قريب انا واخواك اكرم عبد الجبار
وعشان ندي فرصه لأولادنا هما اللي يكتبوا على المدونه

بكرة تفتكرالايام دى وتضحك

بكرة تفتكرالايام دى وتضحك

جملة لذيذة افتكستها مش فاكر امتى لكن فاكر انى استخدمتها كتيير فى الازمات

فى عز ما بكون مشدود بفتكرها....هى ما بتخففش اوى يعنى...بس بتخفف

الغريب انها حقيقة فعلا...يعنى مثلا امتحان العلوم وانا فى رابعة ابتدائى... او التفاضل فى الثانوية العامة.... او مقابلة الدكتورة فى تانية ميكانيكا(الامتحان الشفوى)... او اول مقابلة شغل فى حياتى...وغيره وغيره ...دلوقتى بافتكرها واضحك ..او حتى ابتسم وانا بافتكر اد ايه كنت مشدود وازاى الموقف عدى

الغريب رغم الكلام ده كله الا ان فى مواقف فى حياتى باقول فيها بس ده يعدى واى حاجة بعد كده

سبحان الله

عبدالحكيم

ليلة مقابلة شغل ( رقم 25 فى حياتى تقريبا ) بس مشدود اوى

المحطة الكبيرة

السلام عليكم
ازيكوا يا شباب .... وحشتونى...بجد وحشتونى

فاكرين الكلام عن المحطات فى حياة الانسان...احدثكم اليوم.. بعد المرور باحد اهم المحطات ..
دى بقى محطة مهمة جدا حاجة كدا زى بنها فى الدلتا او رمسيس فى مصر او طوكيو فى اليابان او بكين فى الصين او برلين فى المانيا او كنجستون فى جاميكا..كفاية كده
محطة الجواز ..ايوة انا اتجوزت ..انا نفسى مش مصدق .. لدرجة انى باقعد ساعات اكلم نفسى باصوات مختلفة قائلا ..انا راجل متجوز ...انا راجل متجوز..انا راجل متجوز...اناااا راجللللل متجوززز
الحمد لله
خواطر كتير جتلى وانا داخل على المحطة او حتى فى المحطة نفسها
مثلا
حسيت انى بتولد من تانى...ايه يا عم الكلام الشاعرى ده
لا مش قصدى ..انا قصدى المعنى حرفيا ...ان فى حاجة صعبة اوى ومتعبة اوى بتحصل علشان يطلع منها حاجة حلوة قوى وحياة جديدة تبدأ بريئة وتزداد فيها المسئوليات يوما بعد يوم ...حدث مهم والناس اللى حوليا كلهم فرحانين ومهتمين وانا محور الحدث ده....شبه الولاده مش كده..بس المره دى انا عارف ايه اللى بيحصل

حاجة تانى حسيتها فى يوم العقد...
يعنى بالرغم من ان الحضور كان عدد محدود لظروف زواجى السريعة
الا انى وجدت ان كل اللى جالسين تربطنى بهم علاقات من نوعية فردية وكل واحد يمثل لحظات معينة
ده اقدم واحد فى صحابى اللى اتربينا سوا وجمعتنا مواقف كتييره وده جارى اللى بحبة وافضفض معاه وده اجدع واحد اشتغلت معاه وده اخر صاحب ليا من الشغل ودول جيرانا اللى بيصلوا معانا
يعنى مجموعة من المشاهد كنت اتذكرها لما كان تيجى عينى فى عين حد...يعنى بشوف حياتى كلها بس بمونتاج يعتمد على الشخصيات
كل ده متجمع فى لحظة واحده...علشان يفرحوا بيك
ييعنى بلغة الاكسس من وان تو وان ...دى لحظة وان تو مينى
بجد بجد لحظة جامدة موووت

وللحديث بقية

عبدالحكيم
بعد 18 يوم من الزواج