المطبات وخلافه

موضوع بفكر فيه كتير كل ما اكون سايق او البس مطب
ليه شوارعنا بايظه كده..
وليه السواقه فى مصر متعبه كده
يعنى مطلوب منك تركز فى خمسين حاجه من ضمنهم سوء الطرق او المطبات المقصوده او غير المقصوده ..
حتى المطبات المقصوده الشهيره بالصناعيه ليه ميحطوش تنبيه قبلها...
وليه الطرق بيتصرف عليها كتير ومبتتعملش صح...
مقاول معندوش ذمه..يمكن
مهندس مرتشى احتمال؟

وبعدين فكرت من زاويه تانيه جايز يكون الموضوع ليه فوايد...ازاى بس...
الطرق الزفت دى اللى بتسبب حوادث ليها فايده؟؟؟


وفجأه وانا راجع من عند الميكانيكى لقيت السر
الموضوع ده بيحل جزء كبير من مشكلة البطاله وبيوجد فرص عمل..ماتتضحكش ....عد معايا

1- طبعا الميكانيكى اللى الناس هتحتاجه اكتر نتيجة انهم بيلبسوا مطبات وغيره وغيره
2-محلات قطع الغيار جملة وقطاعى ..طبعا ما انت كل شويه جزء هيحتاج يتغير
3-السمكرى ..ما الناس هتحتاجه بعد كل خبطه
4-الورش او المصانع اللى بتصنع اجزاء قطع الغيار...المصرى يعنى
5-شركات المقاولات...مش كل شويه تلاقيهم بيصلحوا فى كوبرى او طريق علشان ماتعملش صح
6-مصانع السيارات ....ما هى العربيه مش هتعيش كتير وهتحتاج كل كم سنه تغيرها
7-المستشفيات والعاملين فيها ...اطباء وخلافه...ايوه .. مش كل حادثه فيها مصابين
8-الحانوتيه...مش ممكن يكون فى حالات وفاه
9-شركات التأمين اللى الناس بتشترك فيها علشان تصلح العربيه..او خايفه على حياتها
10- اعضاء النيابه او الشرطه..ما هى كل حادثه فيها تحقيق وخلافه ..وممكن حبس...واحتمال سجن يا سلام
11-طبعا فى كل حاجه من اللى انا قولتهم حط اداريين ومحاسبيين وموظفيين ومهندسيين وسكرتاريه وشركة تجيبلهم الوجبات وعربيات توصلهم وبتاع الفول اللى هيقفلهم امام اماكن العمل علشان يفطروا..
11-نسينا حاجه مهمه... المهندس المرتشى ممكن يحتاج يتوب...وكده محتاجين نعين ائمة مساجد فى الاوقاف
..مش كل شوية تقرأ ان فى تعيينات جديدة فى الاوقاف


اهو كل دول...وعلى فكره دول ملايين مش الاف ...ممكن يفقدوا وظايفهم لو الطرق اتعملت صح والحوادث قلت
صدقتنى بقى ان ليها فوايد

وللحديث بقيه
عبدالحكيم

الشغل

السلام عليكم
اكتب اليكم بعد ان غاب الجميع عن المدونة فى مشاغل الحياة...
اكرم اختفى بعد الزواج وحاسس انى هشوفه فى الاعياد بس
ومهند مواعيد شغله الجديدة تجعل لقائى به يحدث مثل كسوف الشمس
وطبعا لقائنا احنا التلاته لما يحصل كسوف فى العيد

انهارده عايز افضفض عن خواطرى واحاسيسى عن الشغل
الشغل...هذا الشىء الذى يشغل الجزء الاكبر من حياة الانسان (حياتى انا يعنى)
بصحى 7 علشان خاطره وبرجع حوالى 6
لو شيلنا ساعات النوم يبقى حوالى تلتين اليوم شغل يعنى تقريبا تلتين الحياة...ممكن حد يستثنى فترة الشيخوخة او الطفوله علشان يحسبها بدقة
هقوله ..فترة الشباب هى قلب البطيخة ...قصدى احلى حته يعنى اليوم فيها بيومين من بتوع الشيخوخه

طيب هذه الوسيله..الشغل ..اللى هى مش غايه ممكن تعمل ايه فى الواحد
ممكن تخلى حياتك مثلا مثلا تحت ضغط...ده حتى بيكتبوها فى الاعلانات دلوقتى
Able to work under pressure
على انها من المميزات اللى المفروض تكون عندك
وكأن لسان حالهم يقول...انت هتستحمل العك بتاعنا...يعنى لو زميلك فى الشغل اترفد وماجبناش حد هتستحمل ...لو المشاكل واضحه عيانا بيانا واحنا مش بنحلها ..هتستحمل والا انت فافى وبتزهق من سوء الادارة بتاعنا

طيب ...
طلعت بنظرية
دور على شغل تانى واديهم بالجزمة
وقعدت اتنقل بين الشركات حاليا انا فى رابع شركة خلال خمس سنوات
بالرغم من انا ده اعطانى بعض النضج فى الحياة
الا انى ساعات بحس انى فى مسلسل حلقاته منفصله متصله
كل يوم البطل فى بلد..ويروح يلاقى ناس غريبه..
مره بلاد الناس الطويله ومره الناس اللى ماشيين على ايديهم ومره الناس اللى بيشاوروا ومش بيتكلموا...حاجه كده زى جاليفر او زى مسلسل اطفال زمان كان بطله محمد رضا (انا مش فاكره اوى)..لكن كان شبه كده

الغريب انك لما تروح تعمل انترفيو يقعد الراجل يكلمك كأنك المفروض تكون عندك مهارات كتير اوى ..يعنى يفضل انك تكون جى من ناسا ولو حكيتلوا اللى انت بتعمله فى شغلك القديم ببساطه مثلا...يبصلك من فوق لتحت
لو شغلك بعد كده تلاقيه بيديلك شوية اوراق ترتبها اوتمسك اداريات عمال..غيابهم وكده (اصل انا مهندس)
يا ولا.....هو ده اللى انت كنت عمال تطمطع علشانه فى الانترفيو
وطبعا بيعتبر ان علشان يرتقى بمستواك او يدربك ده تضييع وقت
انت بقره المفروض تحلب فى الثمان ساعات...عايز ترتاح او تتعلم يبقى بعد الشغل

طيب...
وصلنا الى انه محدش هيعلمك حاجه
يعنى المفروض انى اعمل فيها احمد زكى فى النمر الاسود...اتقدم لا لا لا اتقدم
ولما اروح البيت اقعد اتعلم برامج واقرأ فى كتب
نعم نعم...كمان التلت اللى فاضل فى اليوم هيخدم على التلتين

استثناء وحيد...شفته فى الشركات المالتى ناشيونال
فيها سيستم الى حد ما..وبيعلموك الى حد ما
" الى حد ما " دى علشان اجتهادات المصريين اللى بيحولوا يحولوها الى شركات عاديه (معفنه يعنى)..كده
لكن للاسف كان لازم اسيبهم لانى مكنتش فى مكانى

غصب عنى بقيت بحلم انى ما اشتغلش
واحد كان بيحكيلى على حياة الناس فى امريكا وازاى بيفكروا وبيخططوا لفترة المعاش اللى هيستمتع فيها الواحد بحياته
ولانهم ممكن ياخذوا مقابل كويس ..فى ناس بتخطط للمعاش على الاربعين...قلت يا سلااااااااام
لدرجة انى فكرت امتى ييجى اليوم الى اعدى فيه 10 سنين تأمينات...علشان رصيد اجازاتى يبقى 30 يوم مش 21
واهه 9 ايام الواحد يعيشهم حلوين برضه

ما علينا
من الاخر...اخر نظريه
ان الواحد كأنه شغال دوبلير... رايح الشغل علشان يضرب
يعنى لا يحلم بتدريب ولا استمتاع ولا مستقبل مهنى
ولما ييجى ينقل من شغل الى شغل اهم حاجة الفلوس ...هنا هيضرب وهنا هيضرب
يعنى يسألهم .....من الاخر هضرب بكام
وعلى اقصى تقدير الواحد لو ربنا طول فى عمره هيعيش 60 سنه مثلا
اهه ... فات تلاتين وفاضل تلاتين

وللحديث بقيه
عبدالحكيم