الحالة بقت صعبة. لأ. الحالة بقت لا تطاق
الاسعار ولعت الدنيا. الشاب العازب مش لاقى يتجوز. واللى متجوز مش قادر يصرف على بيته.
طن الحديد وصل 7200 جنيه – على اخر ما سمعت – والله اعلم هايوصل لايه تانى
وكبار البلد مافيش مشاكل عندهم. يبقى مالوش لازمة يحس بالفقراء
والتجار البعض معذور والبعض الجشع ملا قلبه.
خلاص بقينا زى النار. بناكل فى بعض.
والله العظيم اللى يتهز له سبع سموات حرام اللى بيحصل فينا
حرام والله
الشباب اللى هما كلهم عزم ونشاط يموتوا ليه ؟
ليه نقتلهم بغلو الاسعار عليهم.
كان زمان – ايام كامننا – محمد هنيدى كان بيحلم بعربية كوبية
دلوقتى الحلم رغيف العيش . لا حول ولا قوة الا بالله
حرام والله العظيم
يا جماعة احنا داخلين ايام ما يعلم بحالها الا ربنا
تعالوا نفكر شوية ايه اللى ممكن يحصل نتيجة للاوضاع اللى بنمر بيها ؟؟؟؟
شباب وبنات كتير لسه ماتجوزوش عشان مافيش شغل ومافيش دخل ومافيش فلوس تتوفر يقدر يجيب بيها شقة ويتجوز
يبقى الشباب بيعرض عن الجواز. والنتيجة ايه؟؟؟
الحرام طريقه سهل. اى بنت من اياهم باى تمن يقضى معاها ليلة وخلاص.
وواحدة واحدة يدخل فى الحرام ويغوص عشان مش لاقى يعمل حلال
او انه يبقى صيد سهل للجماعات الارهابية. او صيد اسهل للبانجو والحشيش
والدعارة تنتشر. والقذارة تملى الدنيا.
ونسبة العنوسة تزيد وتزيد
والبنات تبدأ ترضى بعلاقات مشبوهة. واحدة تمشى مع واحد والتانية تكتفى ببوسة والتالتة تكتفى بقاعدة حلوة مع حبيبها فى البيت. والرابعة .......
وبدل ما نتقدم خطوة لقدام ونساعد فى الجواز بنرجع عشرة ورا وربنا يستر مش نعمل قانون وترخيص للدعارة
ياشباب مصر – والكلام ليا برضه – ماتفكروش فى الحرام
ماتفكروش فى الدعارة
بلاش الهوت بيرد وقناة ميلودى بتاعة حفيد عبد الناصر اللى كان ابو المصريين كلهم
املوا وقت فراغكم باى حاجة مفيدة
اوعوا تقعوا فى شباك الدعارة او الجماعات الارهابية. انتم بالظروف دى صيد سهل ليهم
لازم ناخد بايدين بعض ونساعد بعض ان عزيمتنا تقوى
ونقول لربنا احنا مش هانرتكب كبيرة من الكبائر عشان نفرغ شهوة
حتى لو مش قادرين دلوقتى. بالصبر والتقوى نقدر ان شاء الله
برغم حديد عز. وبرغم حكومة نظيف. وبرغم اى حد
يا اباء وامهات مصر يسروا الزواج
يسروا الزواج.
يسروا الزواج.
وبلاش عناد فى امور تافهة. المهم توافر الحد الادنى الادنى للزواج
يا اباء وامهات مصر خدو بايد ولادكم
يا شيوخ مصر ومفتى الجمهورية
احنا عارفين ان الزنا حرام. ومش محتاجين انكم تقولوا لينا كده وتعيدوا وتزيدوا فيه
احنا محتاجين شيوخنا يبقوا اقوياء
ويساعدونا نبقى اقوياء
يتحملوا المسئولية العملية ويبدأوا فى اعداد برامج لتيسير الزواج
ده افيد لينا من الفتاوى
برنامج تيسير الزواج يبدأ من خطب الجمعه اللى تحث الكبار على تيسير ازواج بناتهم
يبدأ من محاربة القنوات اللى ملاينة عرى وانحطاط
يبدأ من مساعدة النبات الايتام فى الزواج من خلال حملات تبرع من رجال اعمال يتقوا الله
يبدأ من شحن همة الشباب بالتفكير فى الزواج وعدم الالتفات للمسكنات زى الافلام الجنسية او مرافقة العاهرات
زواج حتى لو فى اوضة فى شقة العيلة. الظروف حكمت بكده ومش عيب. العيب انى اقع فى الحرام
ياحكومة بدلنا ساعدونا فى حلول غير تقليدية للشغل
الصين كانت بتخلى الناس يشتغلوا بعد الشغل العادى بتاعهم فى البيت فى تجميع اجزاء اجهزة وهما فى بيتهم عادى
مش شرط نعمل زيهم. بس شرط نفكر فى اللى يناسبنا وننفذ زيهم
يا حكومة بدلنا ساعدو الشباب على الشغل ووفروا شغل وبلاش بقى الوعود الزائفة
خلاص اتفضحتى يا حكومة وورقة التوت وقعت وعرفنا اصلك.
يا بنات مصر يا اخواتنا وزميلاتنا
راعوا ربنا فى تصرفاتكم ولبسكم
اتقوا الله وبلاش العرى وبلاش البدى وبلاش الكلام بطريقة مايعة
العلاقات بين ولد وبنت لازم تبقى فى حدود العمل و الكلية بس
مش تبقى الكلية او الشغل كوبرى لعلاقات ليس نهايتها الزواج
واخيرا مش هاقدر اقول غير ان ربنا يهدينى ويهدينا جميعا
ويطهر بلدنا من الكابريهات والهوت بيرد والدعارة والقرف
ويحبب فينا الزواج والحلال ويقدرنا عليه
ويكرمنا بالذرية الصالحة والزوج الصالح والزوجة الصالحة والبيت الصالح
اضف اليها او احذف منها او عدل عليها. بس حاول تبعتها لكل اللى تعرفهم.
منقوله عن أحد اصدقائي
No comments:
Post a Comment