انا مخنوق

حد فيكم حس قبل كده انه مخنوق قوي؟؟.... لا مش قصدي الخنقة العادية دي اللي لما تسمع نكتة حلوة تنساها. انا اقصد الخنقة اللي و انت فيها تبقى عايز تهج و تسيب البلد و اللي فيها و تقفل تليفونك و تمشي

اه تمشي من غير ماتعرف انت رايح فين و لا فيه ف جيبك كام جنيه و هايكفوك قد ايه.... اما تحس انك خلاص عامل جوه حياتك زي الدمل اللي لازم يستأصلوه عشان الحياة تكمل!!؟

حد فيكم جاله احساس انه هو الازمة الحقيقية في حياة كل اللي بيحبوه و هو اللي مسببلهم معظم مشاكلهم!! و الحل الاكيد لمشاكل الناس دي انه يمشي.... مش يمشي دلوقتي؟!! لا يمشي يعني يختفي خالص من الحياة.... يموت بقه ولا يغور ف داهية او يسافر المهم انه يتبخر و يبقى جزء من الماضي

اكيد حد فيكم هايقولي: انت متشائم كده ليه يا اخي؟ لا لا اهدا انت بس و اشربلك كوباية شاي و ريح اعصابك و انت هاتبقى فل 

للاسف اللي مش شديد مش هاوجع راسي بالرد عليه لانه اكيد واكل اكله كويسة و مافيش حاجة معكر عليه مزاجه العالي ... ماهو احنا كده دايما ماحدش فينا بيحس بحد الا لو كان ف موقفه وضطر لضيق الوقت (والصدر ايضاً) اني اروح لمخ اللي حس بالاحساس ده مرة و اقوله الله يكون ف عونك

اصل انا حاسس بالحكاية دي قوي النهاردة

حاسس ان فيه غصة ف حلقة مخلياني مش اكل او اشرب ولا حتى عارف اتكلم وكل ده سببه موقف طويل المدي من الاوضاع السيئة اللي بنحسها ف الشغل

حسبي الله و نعم الوكيل ف الشغل و اصحابه...!!!!

هي الناس مالها جرالها ايه

انا مش مضايقني ان الترقيات بتروح لأي حد بغض النظر عن الكفاءة ولا ان المديرين بيتعينو كده عشان هم معارف مدير الشركة ولا حتى عشان الناس اللي اكل معايا عيش و ملح وعاملنه احسن معاملة يخرج يطعني ف ضهري عشان يوصل لهدف ف مخه

انا مش مخنوق من حجم المنافسة الشرسة على فرصة ما تستاهلش ..والفرصة دي بتوصل المنافسين لحد تشويه صورتك مع انك ما عملتش حاجة مع المنافس ده

انا مش مخنوق من المعاملة السيئة اللي بنالقيها من اي حد يبقالي عنده مصلحة

انا مش مخنوق من المواصلات اللي هي دلوقتي احد اسباب سرعة تلف الملابس و الاحذية

انا مش مخنوق من خطيبتي اللي بتزعل مني ع الكيف كده كل ما تحس انها بقالها فترة ما زعلتش مني مع ان الحاجة اللي هي زعلت منها دي بقالها يجي شهر و انا اعتذرت عليها ف ساعتها 

انا مش مخنوق من امي عشان كل ما تشوفني نازل تقولي ارمي الزبالة.... او لانها بتوقف نشاط الحياة لمشاريع كتيييير جدا و تحشرها لغاية يوم الاجازة اللي باتمناه من ربنا و ف الاخر يخلص اليوم والحاجات اللي هي عاوزاها يادوب اتقضت

انا مش مخنوق من اختي الكبيرة عشان كل ما تحصل مشكلة تقوم مكلماني تقولي عاوزاك تجيلي و تقعد تنهنه وانا تاخدني الجولة و اجري عليها عشان احل المشكلة ( مع انها ف معظم الاوقات مابتبقاش عاوزاني اتصرف هي بس عازاني منظر كده قدام الناس قال يعني عندها اخ).... ولا مخنوق من المشوار لانها ساكنة ف اخر الدنيا و مشوارها بيدمر يوم من اوله لاخرهو بيقطع نفسي

انا مش مخنوق من السوبرماركت لانه مش بيجيب نوع الزبادي اللي بحبه وباضطر اروح اجيبه من اخر الدنيا

انا مش مخنوق من جيراني اللي ركبو سيراميك قدام الباب و ماكملش جم كملو من عندنا و عتبة الباب عليت بقيت اتكعبل فيها انا و كل الناس اللي ساكنة ف البيتين!!! ولا من شكل السيراميك المعفن اللي حطوه

انا مش مخنوق من الراجل ابن ال؟؟؟؟ اللي مزعله قوي اني فتحت باب ف شقتى وقاعد فاضحني ف الرايحة و الجاية لدرجة انه اتسببلي ف مشكلة مع خطيبتي و اهلها

انا مش مخنوق لان معظم ساعات الشقة عندنا خربانة وواقفة

 انا مش مخنوق عشان اخويا الكبير عنده كمية تساؤلات ف مخه محتاجة افلاطون و سقراط عشان يقعد يجاوبه عليها حتى لو كانت اسئلة من نوع: انت حاطط الخلفية دي ليه للكبيوتر؟؟؟؟ ومع ذلك الاسئلة تاخد اكتر من نص ساعة

انا مش مخنوق من ولاد ال؟؟؟ اللي رمو على مية وسخة و انا لسه كاوي القميص بتاع الشغل

انا مش مخنوق من ابن اختى ابن؟؟؟؟ اللي طول لسانه على

ولا مخنوق من ان المرتب للشهر التاني على التوالي اسير خزنة الشركة الموقرة لسبب يعمله الله ولا يتم الافراج عنه الا بخلع الضرس

ومش مخنوق لان المدير بتاعي بيتعامل مع قضية تأخير المرتب زي ما بيتعامل مع المجاعة ف روندا ( يعني مش بيتعامل اصلا) ولا كأنه واحد معدي كده ف الشارع مالوش دعوة بحاجة

ولا متضايق من الواد عمرو اللي فتحلي تحقيق ف التليفون وليه ماقلتش كذا  وليه ماعملتش كذا زي ما اكون انا اللي واقفلهم  مرتبه .....مع اني انا اللي متصل وهادفع حق المكالمة

انا مخنوق فعلا لاني كل ما افتكر حاجة من الحاجات دي الاقيني مش عارف اعمل ايه فيها ولا اغيرها ازاي

حتى التطنيش و تكبير النفوخ بقه مش نافع

الحاجات اللي انا مش مخنوق منها كترت قوي ...... صغيرة بقى او كبيرة اهي كترت و السلام

وعلى فكرة انا مش بكتب كده عشان حد يقول على حل!!

انا مش عايز حلول ومش حالل حاجة

.

.

انا يا اخوانا فعلا لاول مرة ف حياتي اقول

انا محتاج حد يواسيني.......... ولحد ما افتح موابيلي..اعرفو اني مش مخنوق

شكرا