كشف حساب

2008
سنة غربية قوي
الواحد مش عارف يقول الله لا يرجعها ولا يقول دي كانت سنة ممتازة...
بجد سنة محيرة قوي و مليانة
انا مش هاتكلم عن اللي التليفزيون صدعنا بيه لا انا هاتكلم عن اللي يخصني منها بنت اللذين دي
ف ناحية منها: انا خطبت و عملت عمرة و لاقيت شقة و حلقت اقرع و تخنت و بقلظت
وفي الناحية التانية: اعصابي تلفت و عنيه وجعتني وعدي على 5 مديرين....
تخيل 5 مديرين اه والله من اول
take an action
لحد المفتش كرومبو .... او حرنكش في احد الروايات

ف 2008 كان نفسي قوي اغير شغلي + ازود دخلي + ابدا ف الدراسة تاني او اكمل يعني
ف 2008 ندمان على ذنوب كتير ارتكبتها + اني ما اخدتش بالي من ناس كتير اسعدوني + مواقف سلبية اخدتها

ف 2009 نفسي افضل ف شغلي ( ف الايام السودا اللي جاية دي) + عاوز احتفظ بدخلي باي شكل + مش عاوز ادرس اي حاجة لان العلم بيتعب اصحابه ( المجانين ف نعيم يا عم) وكل واحد مريحاه دماغه
ف 2009 خايف من ذنوب انيل حاسس اني هارتكبها + مش عاوز اخد بالي من اي حاجة لان المشاعر بتتعب اصحابها + ياريت لساني يلزق ف سقف بقى و مايعرفش ينطق احسن شكله هايقطع عيشي كده سلبي سلبي بس نعيش

2008 اول سنة ف حياتي اتمنى انها تخلص بسرعة لان الاحداث فيها كانت اكتر من اي سنة تانية
2009 اول سنة نفسي انها تخلص من قبل ما تبتدي لانها داخلة علينا بضهرها

بس يا جماعة الحقيقة تتقال
برغم كل المشاكل و المصاعب اللي عدت ف 2008
انما منيو الخمسة لسه بخمسة