مديري ناقص الاهلية... وانا ساكت و مطنش
مديره عديم المؤهلات... و انا ساكت و مطنش
شركتي بتتعامل معايا و مع ادارتي كلها بمنتهى اللاستبداد و التعنت... و انا ساكت و مطنش
زمايلي بيجيبو ف سيرتي من غير اي لازمة مع اني ما اذيتش حد فيهم و بيقولو على كلام مش تمام... و انا ساكت و مطنش
مراتي بتزعل مني على حاجات ماعملتهاش... وانا ساكت و مطنش
و امي زعلانة منى عشان حاجات برضه ما عملتهاش... وانا ساكت و مطنش
صاحبي بيحاسبني و على اني ماكنتش عند حسن ظنه في مع اني ما غلطتش ف حاجة... وانا ساكت و مطنش
هو انا هافضل ساكت كده لحد امتى؟؟
انا حاسس بكمية شحن فظيع.. يا اخوانا الموضوع مالوش دعوة بالرضا بالمقسوم او الكوبايات بتاعة عبدالحكيم
الموضوع يتعلق بالاساس باحساس البني آدم بنفسه و بآدميته و احترامه لنفسه
انا نفسي اسال سؤال و عاوز حد يجاوبني عليه:
هو عيب لو الواحد احترم نفسه؟ هو غلط ان الواحد يراعي كرامته ف المعاملة حتى مع نفسه؟
هي ليه الناس عاوزة مننا معامله على قد توقعاتهم مش على قد ما قدر استطاعتنا؟؟
هو ليه مجرد التفكير ف وضع غلط يفسر على انه نكران لنعمة الله؟؟
يعني مثلا ليه لما افكر ف وضع الشغل عندي انه غلط لان مديريني مغفلين و ان الوضع ده غلط و لازم يتغير امي تقولي احمد ربنا انت احسن من غيرك ( بمعني اسكت و اقفل بقك خالص عشان ما تكفرش بنعمة ربنا تقول تزول ) يعني يتم تفسير الموقف على انه قنوط من نعمة الله؟؟ ..
وليه لا يفسر على انه استعمال لنعمة الله في العقل و شكر لهذه النعمة؟؟
مرة واحدة زميلتي قالتلي انت بتفكرني بأحمد عرابي و مصطفى كامل.. محسسني انك عامل مناضل و خارج من كتاب تاريخ
كان نفسي اقولها و ايه العيب؟؟؟؟ ايه الغلط ف ان الواحد ياخد موقف هو شايفه صح
اقولكم على الحقيقة... الخوف ساعات كتير بيقف قدام الواحد زي الجبل و يمنعه من اخد الموقف ده و ده واحد من اسبابه كلمات زي بتاعة امي دي
الخوف هو اللي ساعات بيخليني ساكت و مطنش...
No comments:
Post a Comment