انا عاوز ايه

كنت اتحدث مع زميلى فى العمل عن فكرة ان الواحد يعمل مشروع ولا يشتغل عند حد
وانا ارى ان الاختيار صعب بين الاتنين وان كنت ارجح انى اشتغل عند حد مع الاعتراف بان حلم المشروع لم يمت بداخلى
قلت له على افكار بفكر فيها زى العمل الاكاديمى فى الجامعة لو جت فرصه ولانه مستبعد الفكره ظل يعدد عيوبها
وفجأة ...سألنى سؤال نزل على كالصاعقه رغم بساطته وتكراره فى حياتى
انت عاوز ايه
وحسيت ان سبع بطاريق بيدونى بالقلم على وشى ورا بعض زى اعلان هولز
ياااااااااااااه....لسه السؤال ابن اللذينا ده بيعمل فى الواحد كده
صحيح...انا عايز ايه
وبسرعه فريت فى دماغى ..والمفاجأه انى لقيت حاجات كتير بس معرفتش اختار واحده
طبعا ممكن بسهولة جدا انى الاقى اجابة مثاليه من الدين...بس هو ده اللى انا حاسه فعلا ولا كلام نظرى

افتكرت مدونتى التاريخية منفسيش فى حاجة ولقيت حاجة غريبة
من 29 حاجة كان نفسى فيهم 7 اتحققوا بالفعل او فى الطريق ان شاء الله
10 ممكن اعملهم الصبح بشوية تنظيم
خد بالك ان الكلام ده فى سنه ونصف...وان الامنيات كانت كتير
ده العفريت فى الافلام بيدى تلات فرص وبالعافيه لو ادى سبعة ودول كانوا 29

ملحوظة تانيه ..ان الواحد امنياته بتفضل تتحرك وتتبدل طول ما هو ماشى
مش شوية امنيات اتحققوا يبقى خلاص...لا لا لا لا
لكن الاكيد ان من فتره للتانيه لازم السؤال ده يتكرر ويكون له نفس التأثير
انت عاوز ايه
ويفضل الواحد يفكر زى ما انا بفكر دلوقتى

وللحديث بقية
عبدالحكيم