صباح الخير او مساء الخير
يا اخوانا عاوز اعترفلكم بسر خطير.... انا باخاف!!!
طبعا واحد فيكم هايستظرف نفسه و يقولي معلش ياصغنن او هايتفلحس و يقولي عادي كلنا بنخاف هاقوله لا مش دي المشكلة ... المشكلة اني انا بخاف بجد يعني خواف!!!؟؟؟
انا مثلا بخاف من الكلب احسن يعضني مع علمي الكامل بان خوفي مش هايمنعه من عضي لو قرر يعمل ده.... انما المقرف اني دايما بخاف. الموضوع طبعا مش موضوع كلب او مكان ضلمة لا سمح الله, الموضوع هو الخوف اللي مسيطر على جزء كبير من حياتي و يمكن من عمري كمان
عمر حد فيكم حس بالاحساس ده؟؟؟؟ حس انه خايف كتير؟؟؟
انا النهاردة قررت اعترف اليكترونيا قدامكم في سابقة هي الاولي من نوعها في الاعتراف اونلاين
انا بخاف
انا يا اخوننا طول عمري خايف, او بمعني اصح طول عمري عندي حاجة خايف منها, و انا طفل كنت بخاف من الضلمة بعدها بقيت بخاف من المدرسة بتاعتي( ابلة ايمان) بعدها خفت من العيال المتشردين اللي كانو معايا ف المدرسة بعدها خفت من ابويا الله يرحمه مرورا بالخوف من السقوط بعدها للخوف من الفشل الدراسي و بعدين خفت من اني مالاقيش شغل ثم خفت من اني ما اترقاش بعدها خفت من انهم يمشوني و خفت كمان من مديري و خفت احسن اللي حبيتها تضيع مني وصولا لخوفي على حياة امي الخ الخ الخ
سلسلة متصلة من المخاوف... صدقوني يا اخوننا انا زهقت من كتر الخوف!! مع اني والله متأكد تماما من ان الخوف ده مش هايمنع البلا ولا هايأخره
ووحياة ابوكم ماحدش يقولي الحل انك تؤمن بقضاء الله و قدره عشان انا مش كافر بقضاء الله انما ده احساس. حد فيكم فاهم؟؟
عامل زي اللي بتحسه لما تقعد ف حضن امك.. بتحس بالامان؟ صح ؟ عمرك عرفت الامان ده جاي منين
اهه انا برضه دايما حاسس بالخوف و مش عارف هو جاي منين. و الاحساس ابن الكلب ده مسيطر على كل ركن ف حياتي زي الظل اللي يفضل لازقلك طول عمرك. هو برضه لازقلي زي ظلي
بالله عليكم يا اخواننا ماحدش عنده شوية امان؟ طب ولو حته صغيرة؟
امان يا محسنين لله
الخائف من زمان
اكرم عبدالجبار
No comments:
Post a Comment