اجمل حاجة لاحظتها عن التدوين انه بيسجل احداث حياتك او على الاقل المحطات الهامة فى حياتك
واتمنيت انى كنت بدأت التدوين قبل كده بكتير ...من يوم ما اتولدت مثلا
ازاى ومكانش فى انترنت؟؟؟؟؟؟
انا باقول اتمنيييت
وده خلانى افكر فى موضوع المحطات فى الحياة ..احيانا الحياة بتمشى فى احداث عادية زى بين المحطتين واحيانا بيجى حدث عامل زى المحطة حتى اننا نستخدمة فى التأريخ زى فرح ابن العمدة عند الفلاحين...مثلا قبل ما ادخل المدرسة... قبل الثانوية العامة... قبل والدى ما يتوفى...قبل ما اشتغل..وهكذا
الاسبوع اللى فات حصل حدث عادى ومش عادى ماحدش بيستخدمة كمحطة مع انه مهم جدا
الاسبوع اللى فات ظهرت اول شعرة بيضاء فى رأسى
ياااااه هو ده الحدث طب ما نا راسى مليانه
يا ريس انا بتكلم عن نفسى وهو كان حدث برضة فى حياتك بس ممكن انت ماخدتش بالك او مش عاوز تاخد بالك..انت حر
بس الموضوع ده خلانى افكر فى الحياة ومعناها وايه اللى هيحصل بعد كده فى حياتى ويا ترى هعيش قد ما عشت؟؟؟
اسئلة كتييييرة...فكرت فيها
بس ...
حبيت اخد بالى من المحطة دى كويس قبل القطر ما يكمل مشى
عبدالحكيم
No comments:
Post a Comment