الذكريات

انهارده قعدت اشوف اول الكتابات بالمدونه لفتت نظري مدونه تقريبا اول مره اشوفها وهي رحلة المليون لعبد الحكيم

بجد على اذ انها ممكن تكون فيها رموز كتير مايعرفهاش إلا هو إلا انها بتعبر عن الحاله اللي هو كان فيها ساعتها وهى حاله تذكرك للماضي وايام زمان قد تكون وانت صغير او وانت كبير في الحقيقه انك بتبقى طول الوقت بتبقى عايش في مكان ما وف وسط مجموعه من الناس و ليك ذكريات كتير قوي في الاماكن ديه ومع الناس دول ولكن انت مابتخدش بالك من الكلام ده إلا لما تبدأ تحس انك بتبعد عن المكان ده او حاجه بتفرقك عن الناس دول
الكلام يبان انه عادي لكن تعالى اديك مثال كام مره قولت انك بتكره حاجه معينه واول ماتروح منك وتبدأ تفتكر مواقفك معاها او فيها تلاقيك على طول بدأت تحن ليها ونفسك ماتبعدش عنها مع انك كنت مش طايقها ولكن ده بيحصل بمجرد فقدانك للشي ده
انا حصلي الموضوع ده انهارده كان نفسي اخد قرار معين من زمان بجد وكنت مستنى اللحظه اللي تتهيئ لي الظروف عشان اخد القرار ده وبجد على قد ماكنت مستني اللحظه ديه واول ما جت الظروف بدأت تتهيئ مش عايز اقوكوا اديه كان جوايا احساس غريب قوي لدرجه انه ممكن يكون وصل بيا لدرجه الخوف.
في اللحظه ديه مرت قدام عنيا احداث غريبه فيها تذكر لحاجات قديمه وتخيل لحاجات ممكن تحصل والله اعلم بيها.
كل اللي اقدر اقوله ان الذكريات بجد احيانا بتخلي الواحد يفكر كتير وبتأثر على تفكيره بشكل كبير.