learn from other

"It is necessary for us to learn from other's mistakes. You will not live long enough to make them all yourself."
~Hyman George Rickover (1900 - 1986)

5-وهى دى النهايه

فعلا لازم نستحمل للنهايه وهى دى النهايه ده اخر شهر يا جماعه للنت ...لييييه؟؟؟طبعا مرض التطنيش منتشر اوى على النتوورك الموقره واحنا اتعدينا الشهر ده ولا هنلم الفلوس ولا هنفصل النت علشان الناس تاخد بالها وتدفعلا لا لا لا لا لا لاامال ايه؟؟هييجى وقت الدفع وطبعا مش هيكون حد دفع فالشركه هتفصل النت وكل واحد يروح لحاله
طبعا اخونا ارشميدس هيقول طب انا هدفع واقيم عليكم الحجه طبعا الشركه لو الفلوس ناقصه جنيه مش هتاخدها وبالتالى لو واحد مدفعش هنرجعلكوا الفلوس وبرضه كل واحد يروح لحاله
نصيحه استمتعوا باليومين الفاضلين ومحدش يدفع وحقيقى حقيقى هتوحشونا
ملحوظه: لسه ناس مدفعتشى من المره اللى فاتت يا ريت لو فى حد لسه متعداش من مرض التطنيش وعاوز يرد يكتب اللى نفسه فيه
والسلام عليكم

الجزء الرابع

نسيت اقول لكم على المشاكل اللى مع الناس فى الشبكه
1-مشكلة الأزعاج اللى احنا فيه ليل نهار ومن اهم اسبابه ان فى ناس خبرتها قليله فى الشبكات اخرهم اخونا اللى اتصل يشتكى من النت وطلع الكارت عنده معمولهdisable
2-لما جينا نلم الفلوس بعض الناس تقول ( فلوس ها ها - هو هو - هى هى)ايوه وبعدين (هو احنا يعنى مش هندفع ها ها طب ادفع(ايوه هدفع طب تعالى - تعالالى بكره)..وهكذا
3-واحد يطنش فى الدفع يقولك(هو انت جيتلى وانا مدفعتش)طب ابعت مع حد

4-واحد يخبط عليك باليل عشان يقولك( لا لا لا كده ما ينفعش انا دافع فلوس من حقى اخد خدمه )وهو واحد من اللى بيطلعوا عينا فى الفلوس
5- انتو اللى غالطانين - ليه يا عم -النت باظت من يوم ما زودتم الناس-وهو من اخر مجموعه دخلت
6- انا اقولكم على الحل - قول - تعالوا يوم 10 فى الشهر واللى مدفعش طلعوه الكلام ده يوم عشرين وهو ما دفعشى اصلا
7-يا جماعه لو فى حاجه بايظه او شكين فيها قولوا ونشترى غيرها الراوتر يا سيدى طيب نجيب غيره وده بكام من 400 الى 500مين فين ليه ..ايوه جاى... معلش فى حد بينده عليا
8-هو فى كام واحد متوصل على الراوتركل الناس ليه لان اللى اعرفه ان الراوتر ما يستحملش تقصد الراوتر ولا السويتش هو ايه الفرق بينهم؟؟؟؟؟؟
9-الحل ان انتم تلموا الأشتراك بدرى طب متلم انت شهرانا اصلى ساكن بعيد معرفش حد تقولشى ساكن فى بشتيل
10-واحد حدق يسهر طول الليل يجمع ويطرح يلاقى ان فى جنيه وربع بيتلم زياده يقولك الا قوللى هو انتوا بتكسبوا كام من الموضوع ده طب اعمله انت وخد اللى احنا بناخده
11-تفضفض مع واحد وتقوله بصراحه احنا زهقنا وعايزين نفضها ايه تفضوها مش من حقكوا ليه يا ارشميدس ما دام شلتوا المسئوليه لازم تستحملوا حتى النهايه

الجزء الثالث

وقفنا عند: الخدمه كانت بدأت تسوء ( من الشركه يعنى) والناس كانت بدات تطلب انها تدخل معاهم - فكروا فى فكره انهم يرفعوا كفاءة الخدمه الى 512 بدل 256 وفى نفس الوقت يدخلوا عدد من اللى نفسهم يدخلوا النت وبكده الكل يستفيد الموضوع عرضوه على الناس والكل كان موافق مدام مفيهاش فلوس زياده (ايوه انت وافقت) المهم نفذوا الفكره - لكن الشركه كانت برضه زفت والخط كان بطىء برضه فكروا فى فكره جديده يعملوا خطين.....

(لحظه واحده ارد على التليفون وارجعلكوا)(ده واحد كان بيسأل النت فيها ايه - مع انها دلوقتى شغاله - تقريبا العيب فى جهازه)نكمل الحكايه...فكروا يعملوا خطين 256 يعنى خط جديد وتتقسم الناس بدل خط واحد 512وده هو الوضع الموجود حاليا
نسيت احكلكوا على حاجه مهمه

الجزء الثاتي

اللى حصل بعد كده ان الراوتر اللى كان موجود طلع فى بورت بيعلق المهم لأن واحد من التلاته ( فاكرينهم) لانه مهندس كمبيوتر عارف يشترى الحاجه منين والاماكن اللى ضمانها كويس - المهم ان الراوتر اتغير ورجعت النت تشتغل فى الوقت ده كان لسه فى اماكن لناس تدخل معاهم والموضوع بدأ يتعرف ففكروا يدخلوا تلاته اصاحبهم كمان(برضه انت مش منهم )وفعلا دخل ناس معاهم لاحظ معايا ان الموضوع كله اصحاب فى اصحاب بعد كده بدأوا يحسوا ان الخدمه مش كويسه والمفروض تكون احسن - طب يعملوا ايه كان فى نفس الوقت الناس بتيجى تسأل عنهم او تنادى عليهم علشان تدخل معهم وده مش واحد ولا اتنين ده وصلت لناس من عماره بعيدة وناس من الجزيره وناس من....وده شىء مزعج جدا ليهم ولأهاليهم _ وكان فى ناس بتتصل , ده غير اللى بيتصلوا من المشتركين علشان يشوفوا النت امبارح كان بطىء ليه وتخيل وانت جى من الشغل تعبان تلاقى ناس عماله تتصل - حتى لو اصحابك- شوف كمية الازعاج فى نفس الوقت تمشى فى الشارع ولا رايح الجامع تلاقى ناس بدور عليك وبتسألك انت الشيخ بتاع النت؟؟ ( اصل فيهم واحد بدقن ) ايوه -تقولشى بتاع بطاطا يسالوك وتعد تفهمهم لدرجة انه كان بيعرض على الناس يلموا من بعض ويساعدوهم من غير مقابل علشان يعملوا نتوورك لوحدهم ويحلوا عنهم حصل ايه بعد كده
اكملكوا فى ( تحسين الخدمه) ت

عوده للماضي

اسمحوا لي ان اعود بكم للماضي

كان موضوع وضع عليه اخونا أكرم عنوان

كتاب البدايه والنهايه لعبد الحكيم بن اسعد

وهذا الجزء الاول

السلام عليكم قبل اى حاجه انا عايز اقول ان جميع اعضاء النت اخوتنا يعنى محدش يزعل وردا على الكلام اللى كتبه احد الاعضاء عاوز اقول كلمتين

الحكايه بدأت ازاى ( قصدى النت يعنى) هه؟بدأت بتلاته شباب زى الورد ( او كانوا زى الورد) من اكتر من سنه فكروا يعملوا نتوورك بينهم وساعتها كان الموضوع صعب جدا المهم فكروا وقرروا وعملوا النتوورك ساعتها كان لسه مفيش شركه دخلت دى اس ال امبابه وفضلوا كده كذا شهر بعد كده عرفوا ان فى شركه دخلت الموضوع ده فى امبابه كلموا اصحابهم حوالى 5 كمان على ما اذكر (لا انت مش فيهم ) المهم علشان يقللوا الاشتراك ويتوزع عليهم كلهم وعلى فكره فى الوقت ده فى ناس رفضت تدخل معاهم علشان النت العادى مكفيهم ومبيدخلوش كتير منهم ناس معانا دلوقتى بيشعروا بضيق تنفس لما الدى اس ال يقطع) بعد كدا وصلنا قصدى وصلوا اصحابهم على النتوورك وفضلت الشركه طمتوحهم كعادة الشركات المصريه حوالى شهرين لحد ما راح اتنين الله يباركلهم للشركه وكانوا هيتخانؤا لكن حصل خير ووصلوا الدى اس ال اخيرا بعد عذاب وايه اللى حصل بعد كده؟؟حصلت مصيبه
البقيه فى ( خدمه سيئه) ت

قول الشاعر

مش عارف ايه اللى حصلى
حاسس انى فى حالة عدم اتزان شديدة
موضوع الجواز وسدة نفسى الغريبة عنه وبعدين احساس بالزهق بنكهة اليأس
وساعات مش عارف انا عايز ايه ... ما بقاش فى حاجة بتثير حماسى
ولا الشغل ولا الجواز ولا تحقيق الذات...ولا اى حاجة
بس انا حاسس ان انا ليا يد فى الموضوع ده .. حاجة غلط عملتها يمكن ذنب يمكن تفكير بطريقة غلط وسبت نفسى
مش عارف
اقولكم على حاجة ...امبارح الموضوع ده شد شوية عليا افتكرت بعض ابيات الشعر اللى كانت ستى بتقولها وحسيت انها تنطبق عليا
الابيات تقول
ابو قردان زرع فدان
نصه ملوخية ونصه بتنجان
فحر فى الطين لقى سكين
دبح ولاده وقعد مسكين

عبدالحكيم

RE: الاهانة

بسم الله
السلام عليكم
المدونة دى تعليق على مدونة اخى اكرم قبل اللى فاتت (الاهانة)..
يمكن جت متاخرة شوية بس الرد عمال يجى على بالى كل يوم
اتفق معاك يا اكرم فى اننا فعلا مش راضيين عن اى شعرة تمس النبى صلى الله عليه وسلم والواحد قد ايه بيتحرق دمه كل لما يشوف اى صورة او كلمة عن الموضوع ده
بس اسمحولى اتكلم بجد جدا المرة دى
هل فعلا احنا مش عارفين نعمل ايه؟؟؟؟؟
طبعا اكرم جاب اهم حاجة فعلا وهى الدعاء
طب وايه تانى . . . . . . .نقول مثال
يعنى معلم علم ناس ازاى يكونوا احسن ناس وبعد ما مات هما بدؤا يهملوا فى وصاياه واحدة واحدة لما بقوا فى منتهى الضعف
جت شوية جهلة من اعداءه وفضلوا يشتموا فيه
تفتكروا يزعل من الناس اللى بتشتم ولا من الناس اللى علمهم؟؟؟؟؟؟
الموضوع كبير ومحتاج مجهود كبير بس احنا اللى بنكسل
لازم نرجع كلام النبى صلى الله عليه وسلم فى حياتنا ...الموضوع بجد
ويا ريت نفكر فى الكلام ده كويس
بس ملحوظة اخيرة...الصورة بتاعت البنت اللى مش فاهمة حاجة دى ونص عريانة تطحت فى مدونة عن النبى صلى الله عليه وسلم... معلش يا اكرم انا مش عارف عدت عليك ازاى...يا ريت تشيلها بالله عليك

واخيرا شوفوا ربنا قال للنبى صلى الله عليه وسلم ايه فى سورة الحجر
فاصدع بما تؤمر واعرض عن المشركين

إنا كفيناك المستهزئين

عبدالحكيم

اقتراع لاستيراد شقق صيني

صباح او مساء الخير
ايها الاخوة المواطنون .. نظرا للمشاكل العديدة المترتية على نقص المساكن و مشكلة الاسكان في مصر بشكل عام.
و كتجاري و ابن سوق و مدقدق ف احب اقترح على سيادتكم فكرة هايلة
ليه ما نسدش الثغرة الموجودة ف السوق المصر من نقص الشقق بإننا نستورد شقق من حبيبتنا و حبيببة الملايين الصين؟؟؟؟؟
هم يعني ماعملوهاش ؟!؟! اكيد عملوها
اللي خلاهم استنسخو عيال مش هايستنسخو شقق
طيب تعالو سوا زي الناس المحترمين نناقش الموضوع بواقعية و نشوف ايه المزايا و العيوب اللي ممكن نواجهها لما ننفذ الحوار ده عشان لو لاقينا الحوار قشطة نبقى نتوكل و ننفذ فورا و لو طلع حوار فاكس ننفض للحياة
تعالو نشوف

المزايا:-
1- رخيصة و سهلة الاستعمال
2- هانخرب بيت احمد عز و ده واجب وطني ممكن تخش فيه الجنة
3- مش هاتتعب ف فرشها لانها ف الغالب هاتكون متجهزة بعفشها جاهز ( زي التليفونات الصيني اللي ب أنسر ماشين)
4- لو باظت منك مش هاتزعل عليها لانك ما دفعتش فيها كتير
5- لو طلقت مراتك و حبت تعمل عليك ناصحة و تقولك انها حاضنة تبقى تسلملي ع الترماي ..... تاخدها هي يعني جت ف جمل
6-تقدر تفكها و تركبها ف الحي اللي انت عاوزه
7- مش هاتحتاج تركب فيها لا ميه ولا صرف و لا اي حاجة و مراتك تبقى تروح النيل تمشي تدلع تملا القلل و منها ريحت بالك من الفواتير و منها نشطت الفلكلور المصري اللي انقرض من فترة و من ساعة السد العالي


العيوب :-
1- مالهاش ضمان و ممكن تبوظ منك اول ما تسكن فيها ( طظ و هي يعني البيوت الاسمنت هي اللي جامدة)
2- ممكن تهنج منك و السوفت وير بتاعها يقع منك ( اه دي صعبة جدا يعني مثلا ابقى رايح البي ندا الطبيعة ف الحمام الاقيه اتغير فجأة و بقى الصالون او اجي افتح اكرة الباب الاقي الدوش فتح على راسي لا اوفر دي )
3- مش هاتعرف تبيعها لان ف الغالب تجار الموسكي هايجيبو الموديلات الجديدة بتاعتها و يبيعوها برخص التراب
4- لو ماشي بيها جنب ش عبد العزيز ممن تتسرق او تتسبت منك و العيال و امهم يضيعو
5- لو هنجت منك او جالها فيروس كل العفش اللي ف الشقة هايضيع عشان هانزلولها سوفت وير جديد (بس قشطة موت تخيل انك تقدر تجدد عفش الشقة كل شوية لو نزلت البرنامج بتاع الشقة من ع النت )

و مما سبق يا اخواننا انا شايف ان الحوار قشطة و الله و المفروض اننا نفعل المبادرة دي و نبدأ ندور على الشقق دي ع النت
و طبعا اللي عنده رأي و عامل نفسه فلحوس ممكن يتفضل و يتشطف ... اسف يتشطر و يرد على و نتناقش
ولاوني شبه متأكد ان مافيش شاب اليومين دول ممكن يرفض فرصة زي دي

مراسلكم من امام الكمبيوتر... المكتب المبهدل... اكرم عبدالجبار

الاهانة

اعوذ بالله من الشيطان الرجيم
بسم الله الرحمن الرحيم

"و سيعلم الذين ظلموا اي منقلب ينقلبون" الشعراء 227
السادة القراء ...
السادة اللي هايسمعوا عنا ف يوم من الايام...
اي سادة و السلام...
والله العظيم يا اخواننا احنا مش راضيين عن اللي بيحصل من اهانة زي دي
انا طبعا باتكلم عن اهانات زي اللي ف الصورة دي...
واحدة رقيعة زي اللي ف الصورة دي لابسة هدوم مكتوب عليها انا قريت الكوميديا بتاعة محمد؟!؟!؟!؟؟!؟
و طبعا برضه باتكلم بالاصالة عن نفسي و بالنيابة عن اخواتي مهند و عبد الحكيم
احتمال يكون حد غيرنا بيقرا الكلام ده بعد اي وقت كان ... قليل او كتير و زينا كده برضه مش موافق برضه و شايف زينا القائمين باعباء الديانة ف بلاد المسلمين واقفين و حاطين اديهم ف جيوبهم و بيصفروا ببقهم زي ما يكون الدنيا ربيع و الجو بديع
انا بس حبيت اسيب علامة عشان واضح ان الايام الجاية هاتشوف ازفت من كده و عشان ما نقفش قدام اجيال اللي جاية ف موقف اللي شفنا الكلام ده و سكتنا حبيت اسيب الكلمة دي
حابب بس اقول لاي حد ييجي بعدنا
لا
احنا مش موافقين على الكلام ده
اصل احتمال يطلع مخنثين اسواء من بتوع دلوقتي يقولو ماهم الناس بتاعة زمان" اللي هو احنا يعني" كانو اقرب لربنا منا و شافو النبي بيتهان و كانت روحهم رياضية و سكتو عشان يبقى فيه رأي و رأي اخر
ف انا اهه بقول: لااااااااااااااا
انا من بتوع زمان اهه و مش موافق و هاطق من الغيظ
و هاموت و انا شايف جناب الرسول بينتهك و انا مش عارف اعمل حاجة
بس برضه اهه زي ما القرآن بيقول " معذرة الي ربكم "
و يمكن نفسي اوصل صوتي لرسول الله و اقوله يا رسول الله انا رافض اللي بيحصل ده بس ما باليد حيلة. والله يا رسول الله ماعرف حاجة اقدر اعملها غير الدعاء
يا اخوانا اللي يعرف حاجة نقدر نعملها غير الدعاء يقولي و انا على اتم استعداد لتنفيذها
اعذروني لو ماقدرتش اكمل كلام... بس بحقيقي مش لاقي حاجة اقولها تاني
شكرا
كان نفسي امضي بأكرم كالعادة بس اي كرامة دي اللي هاوصف بيها نفسي والرسول بيتهان

امضاء
مش اكرم